అమెరికా అధ్యక్షుడు డోనాల్డ్ ట్రంప్(Donald Trump) ఇరాన్ ప్రతిపాదనపై అసంతృప్తి వ్యక్తం చేసినట్లు సమాచారం. వ్యూహాత్మకంగా కీలకమైన స్ట్రైట్ అఫ్ హోర్ముజ్(Strait of Hormuz) జలసంధిని తిరిగి తెరవాలని ఇరాన్(Iran) సూచించినప్పటికీ, ముందుగా అమెరికా ఆంక్షలు ఎత్తివేసి విభేదాలను ముగించాలనే షరతు పెట్టింది. అయితే ఈ ప్రతిపాదన ట్రంప్కు ఆమోదయోగ్యంగా లేదని అధికార వర్గాలు పేర్కొంటున్నాయి.
అమెరికా విదేశాంగ కార్యదర్శి మార్కో రూబియో(Marco Rubio) కూడా ఇరాన్ ప్రతిపాదనపై సందేహాలు వ్యక్తం చేశారు. జలసంధి వినియోగానికి అనుమతి తీసుకుని ఫీజులు చెల్లించాలన్న ఇరాన్ భావన సరైంది కాదని ఆయన వ్యాఖ్యానించారు. అంతర్జాతీయ జలమార్గాలపై ఏ దేశానికీ ప్రత్యేక హక్కులు ఉండవని స్పష్టం చేశారు.
అమెరికా ప్రధాన లక్ష్యం ఇరాన్ అణ్వాయుధాలను సాధించకుండా అడ్డుకోవడమేనని ట్రంప్ ప్రభుత్వం పునరుద్ఘాటిస్తోంది. అణు కార్యక్రమాన్ని పూర్తిగా నిలిపివేయకుండా ఎలాంటి ఒప్పందానికీ అమెరికా సిద్ధంగా లేదని రూబియో స్పష్టం చేశారు.
ఇదే సమయంలో జరగాల్సిన శాంతి చర్చలను ట్రంప్ రద్దు చేయడంతో పరిస్థితి మరింత అనిశ్చితిలో పడింది.
ఇరాన్ విదేశాంగ మంత్రి అబ్బాస్ అరఘ్చి (Abbas Araghchi) ఇస్లామాబాద్కు వెళ్లినా, అమెరికా ప్రతినిధులతో భేటీ జరగలేదు. ఇదే సమయంలో ఇరాన్ మూడు ప్రధాన షరతులు పెట్టింది—అమెరికా ఆంక్షలు ఎత్తివేయడం, మధ్యప్రాచ్యంలో శత్రుత్వం ఆపడం, అణు చర్చలను వాయిదా వేయడం. 2015లో కుదిరిన అణు ఒప్పందం ట్రంప్ మొదటి పదవీకాలంలో రద్దు కావడంతో ప్రస్తుతం చర్చలు సంక్లిష్టంగా మారాయి.
