ఏపీ డీజీపీ హరీష్ కుమార్ గుప్తా, అభినందించి సత్కరించిన 2024 అక్టోబర్-డిసెంబర్ నాల్గవ త్రైమాసికానికి ఉత్తమ క్రైమ్ డిటెక్షన్ ఆవార్డుల ప్రదానం జరిగింది. ఈ కార్యక్రమం రాష్ట్ర డీజీపీ కార్యాలయంలో బుధవారం జరిగింది. సీ.ఐ.డి డీజీపీ శ్రీ రవిశంకర్ అయ్యన్నార్ నేతృత్వంలో ఉత్తమ క్రైమ్ డిటెక్షన్ కేసులను ఎంపిక చేశారు. ఈ అవార్డుల ద్వారా పోలీసుల సాంకేతిక విధానాలు, వినూత్న మార్గాలను ప్రతిపాదించడం జరిగింది.
పశ్చిమ గోదావరి జిల్లా ఎస్పీ అద్నాన్ నయీం అస్మి నేతృత్వంలోని బృందం ఆకివీడు మండలంలో హత్య కేసును సులభంగా ఛేదించి ఉత్తమ బహుమతి పొందింది. ఈ కేసు అత్యంత క్లిష్టమైనది అయినప్పటికీ, బృందం సమర్థవంతంగా దర్యాప్తు చేసి నిందితుడిని పట్టుకుంది. అలాగే, శ్రీ సత్యసాయి జిల్లా ఎస్పీ శ్రీమతి రత్న నేతృత్వంలోని బృందం 26 సంవత్సరాల నాటి పాత కేసును ఛేదించి ద్వితీయ బహుమతిని పొందింది.
విజయనగరం జిల్లా ఎస్పీ వకుల్ జిందాల్ నేతృత్వంలోని బృందం విజయనగరం వన్ టౌన్ పోలీస్ స్టేషన్ పరిధిలో సైబర్ క్రైమ్ కేసును ఛేదించి, ఐదుగురు నిందితులను అరెస్టు చేసింది. ఈ కేసులో రూ.10 లక్షల నగదు, రూ.9.20 లక్షల విలువైన బంగారు ఆభరణాలు రికవరీ చేసి, మరొక కేసులో రూ.22 లక్షలను ఫ్రీజ్ చేసి, నిందితులను పట్టుకోవడం ద్వారా బృందం తృతీయ బహుమతి అందుకుంది.
గుంటూరు జిల్లా ఎస్పీ యస్. సతీష్ కుమార్ నేతృత్వంలోని బృందం మైనర్ బాలిక హత్య కేసును ఛేదించి కన్సోలేషన్ బహుమతిని అందుకుంది. ఈ అవార్డుల ప్రదానంలో మొదటి స్థానం పొందిన కేసుకు లక్ష రూపాయల నగదు, రెండవ స్థానం పొందిన కేసుకు రూ.60 వేలు, మూడవ స్థానం పొందిన కేసుకు రూ.40 వేలు, కన్సోలేషన్ బహుమతిని రూ.20 వేలు నగదుతో అందజేశారు.
