Indian Army Chief: భారత ఆర్మీకి కొత్త చీఫ్ ఆఫ్ ఆర్మీ స్టాఫ్గా లెఫ్టినెంట్ జనరల్ ధీరజ్ సేథ్ నియమితులయ్యారు. ప్రస్తుతం ఆర్మీ చీఫ్గా ఉన్న జనరల్ ఉపేంద్ర ద్వివేది జూన్ 30న పదవీ విరమణ చేయనున్న నేపథ్యంలో ఈ నియామకం చోటుచేసుకుంది. ప్రస్తుతం వైస్ చీఫ్ ఆఫ్ ది ఆర్మీ స్టాఫ్గా సేవలందిస్తున్న ధీరజ్ సేథ్కు అత్యున్నత సైనిక బాధ్యతలు అప్పగించారు. ఖడక్వాస్లాలోని నేషనల్ డిఫెన్స్ అకాడమీ పూర్వ విద్యార్థి అయిన లెఫ్టినెంట్ జనరల్ సేథ్, 1986 డిసెంబర్లో ఆర్మర్డ్ కార్ప్స్లో తన సైనిక ప్రస్థానాన్ని ప్రారంభించారు.
చదువులో కూడా ప్రతిభ కనబరిచి, డిఫెన్స్ సర్వీసెస్ స్టాఫ్ కాలేజీలో జూనియర్ కమాండ్ కోర్సులో ప్రథమ స్థానం సాధించి ఉత్తమ ఆల్రౌండ్ స్టూడెంట్ ఆఫీసర్ అవార్డు పొందారు. దాదాపు నాలుగు దశాబ్దాల సుదీర్ఘ సేవలో ఆయన అనేక కీలక పదవుల్లో పని చేశారు. వ్యూహాత్మక ప్రణాళికలు, ఆపరేషనల్ కమాండింగ్, దళాల ఆధునీకరణ వంటి రంగాల్లో విశేష కృషి చేశారు. జమ్మూ కాశ్మీర్లో ఒక ఆర్మర్డ్ రెజిమెంట్ మరియు బ్రిగేడ్కు నాయకత్వం వహించి కీలక ఆపరేషన్లలో భాగమయ్యారు. అనంతరం సుదర్శన్ చక్ర కార్ప్స్ కమాండర్గా, ఢిల్లీ ఏరియా జనరల్ ఆఫీసర్ కమాండింగ్గా సేవలందించారు.
ఆ తర్వాత సౌత్ వెస్ట్రన్ కమాండ్ మరియు సదరన్ కమాండ్ రెండింటికీ జనరల్ ఆఫీసర్ కమాండింగ్-ఇన్-చీఫ్గా పనిచేసి అరుదైన ఘనత సాధించారు. అదనంగా అంగోలాలో ఐక్యరాజ్యసమితి మిషన్లో బాధ్యతలు నిర్వర్తించారు. సైన్యంలో శిక్షణ, క్రమశిక్షణ, సంక్షేమం మరియు ఆపరేషన్స్ విభాగాల్లో కీలక పాత్ర పోషించారు. ఆయన నియామకం భారత సైన్యానికి కొత్త దిశను అందిస్తుందని రక్షణ వర్గాలు భావిస్తున్నాయి.
ALSO READ: West Godavari | చిన్నారి జాహ్నవి మిస్సింగ్ కేసులో ట్విస్ట్.. మరణించిన కుక్క
